చెయ్యిచ్చిన నైరుతి... ఆశలన్నీ ఈశాన్యంపైనే!

By Editorial Team Updated : 16 Oct 2026 02:21 IST Ee Font size

• A
• A+
• A++

4 min read

ఈసారి నైరుతి రుతుపవనాల సీజన్‌ వానలకు తీవ్రమైన కొరత, ప్రాంతీయ వర్షపాతంలో వ్యత్యాసాలు, సేద్యానికి అవసరమైనంతగా నేలలో తేమ లేకపోవడం వంటి సమస్యలతో ముగిసింది. మరోవైపు, ఎల్‌నినో ప్రభావం వచ్చే ఏడాది ఆరంభం వరకు కొనసాగనుంది. ఇటువంటి పరిస్థితుల్లో, అక్టోబర్‌-డిసెంబర్‌ కాలంలో ఈశాన్య రుతుపవనాలు తెచ్చే వర్షాలైనా జలాశయాలను నింపి, నేలలో తేమను పెంచి, శీతాకాల పంటలకు(రబీకి) నీరు అందించగలవా? అన్న ప్రశ్న ఉత్పన్నమవుతోంది.

భారత వాతావరణ విభాగం(ఐఎండీ) నివేదిక ప్రకారం, ఈ ఏడాది జూన్‌-సెప్టెంబర్‌ కాలంలో దేశంలో 759.4 మి.మీ. వర్షపాతం నమోదైంది. దీర్ఘకాలిక సగటు వర్షపాతం 868.6 మి.మీ. కాగా, ఈసారి 12.6శాతం కొరత ఏర్పడింది. దక్షిణ భారత సాధారణ వర్షపాతంలో 76శాతం; తూర్పు, ఈశాన్య భారతాల్లో 74శాతమే నమోదైంది. ఇక వాయవ్యంలో 94శాతం, మధ్య భారతంలో 97శాతం చొప్పున వర్షపాతం నమోదైంది. ఈ జాతీయ, ప్రాంతీయ సగటులు స్థూలమైనవే తప్ప జిల్లాస్థాయిలోని వ్యత్యాసాలను ప్రతిబింబించవు.

పంటలపై ప్రభావమెంత?

ఎల్‌నినో వల్ల పసిఫిక్‌ మహాసముద్రంలోని మధ్య, తూర్పు ప్రాంతాల జలాలు అసాధారణంగా వేడెక్కుతాయి. వాతావరణంలో గాలులు, తేమ ప్రసరణలో మార్పులు సంభవిస్తాయి. ఇది భారత్‌లోని కొన్ని ప్రాంతాల్లో తేమ సమకూరడాన్ని తగ్గించి, నైరుతి రుతుపవనాలు బలహీనం కావడానికి దారితీస్తుంది. వానలు ఎప్పుడు, ఎక్కడ పడతాయనేది రుతుపవనాల కాలంలోని అల్పపీడన వ్యవస్థలు, రుతుపవనాల్లో వచ్చే అంతర్గత మార్పులు, హిందూ మహాసముద్ర ద్విధ్రువత(ఐవోడీ), ప్రాంతీయ గాలుల ప్రసరణపై ఆధారపడి ఉంటుంది. ఐవోడీ దిశ, బలాన్ని బట్టి ఎల్‌నినో కారక మార్పులు తీవ్రం కావచ్చు, లేదా తగ్గవచ్చు. అక్టోబర్‌-డిసెంబర్‌ కాలంలో తటస్థ ఐవోడీ పరిస్థితులు ఏర్పడతాయని ఐఎండీ అంచనా వేసింది. కాగా, వచ్చే ఏడాది జనవరి-మార్చి వరకు తీవ్రమైన ఎల్‌నినో పరిస్థితులు ఏర్పడటానికి 90శాతానికి పైగా అవకాశం ఉన్నట్లు అమెరికా జాతీయ సముద్ర, వాతావరణ పరిశోధన సంస్థ ‘నోవా’ నివేదించింది.

ఐఎండీ ఆగస్టు చివరి నుంచి సెప్టెంబర్‌ మధ్య వరకు అందించిన నివేదిక ప్రకారం, దేశవ్యాప్తంగా పరిశీలించిన విస్తీర్ణంలో 19.34శాతం తీవ్రమైన వ్యవసాయ వర్షాభావానికి గురైంది. మరో 55.6శాతం విస్తీర్ణంలో స్వల్పంగా తేమ కొరత ఉంది. ఇది కేవలం పరిశీలన సమయంలో ఉన్న పరిస్థితులనే వెల్లడిస్తుంది కాబట్టి, దిగుబడి నష్టానికి దీన్ని నిదర్శనంగా తీసుకోకూడదు. ఆంధ్రప్రదేశ్‌లో పరిశీలించిన విస్తీర్ణంలో 74.1శాతం భూమి తీవ్రస్థాయి వర్షాభావానికి గురైంది. తమిళనాడులో ఇది 40.3శాతం, కర్ణాటకలో 38.1శాతం, తెలంగాణలో 24.4శాతంగా ఉంది. దీని అర్థం ఆంధ్రప్రదేశ్‌లో ముప్పావు వంతు పంటలు నష్టపోయాయనో, అక్టోబర్‌లోనూ అదే పరిస్థితి ఉందనో కాదు. అయితే ప్రకాశం, అన్నమయ్య, పల్నాడు జిల్లాల్లో మాత్రం వెంటనే క్షేత్రస్థాయి పరిశీలనలు, తనిఖీలు చేపట్టాలని ఈ నివేదిక సూచించింది. వాతావరణ అనావృష్టి, వ్యవసాయ అనావృష్టి ఒక్కటి కావు. వర్షపాత కొరత అనేది తగ్గిన వానలను సూచిస్తుంది. వ్యవసాయ అనావృష్టి నేలలో తేమ కొరత, పంటల పరిస్థితి, నీటిపారుదల సదుపాయాల లభ్యతపై ఆధారపడి ఉంటుంది.

వ్యవసాయశాఖ సెప్టెంబర్‌ నివేదిక ప్రకారం, 1,086.31 లక్షల హెక్టార్లలో ఖరీఫ్‌ పంటలు వేశారు. గతేడాది ఇదే సమయంతో పోలిస్తే ఇది 17.69 లక్షల హెక్టార్లు తక్కువ. ప్రధానంగా వరి విస్తీర్ణం తగ్గగా, పప్పుధాన్యాల విస్తీర్ణం పెరిగింది. అయినాసరే, వర్షపాత కొరత ధాన్య దిగుబడి తగ్గిపోవడానికి నేరుగా కారణమవుతుందని చెప్పలేము. కాలువల ద్వారా నీరు అందే తీరప్రాంత నీటి అవసరాలు, వర్షాధారిత, లోతట్టు ప్రాంతాల అవసరాలు వేర్వేరుగా ఉంటాయి. పంటలకు అదను చూసి, ఉన్న నీటినే అందిస్తే నష్టాన్ని తగ్గించవచ్చు. రబీ సాగు చేయాలనుకునే రైతులకు నేలలోని తేమ, రాబోయే వర్షాలు, విత్తనాల ఎంపికపై సమగ్ర సమాచారం అందించాలి.

ఈ ఏడాది జూన్‌-సెప్టెంబర్‌ కాలంలో దేశవ్యాప్తంగా వర్షపాత కొరత 109.2మి.మీ.గా ఉన్నప్పటికీ- జలాశయాలు, భూగర్భ జలాలపై దాని ప్రభావం వర్షం కురిసిన ప్రాంతం, వర్షపాత తీవ్రత, వినియోగంపై ఆధారపడి ఉంటుంది. ఏదిఏమైనా భూగర్భ జలాలను విపరీతంగా తోడేసి తాత్కాలికంగా పంటలను రక్షించుకుంటే, భవిష్యత్తులో అవి దారుణంగా పడిపోతాయి. కాబట్టి తాగునీటి భద్రత, పశువుల నీటి అవసరాలను జిల్లాస్థాయి ప్రణాళికల్లో చేర్చాలి.

కొన్ని ప్రాంతాలకు సానుకూలం

అక్టోబర్‌-డిసెంబర్‌ మధ్య దేశంలోని చాలా ప్రాంతాల్లో సాధారణంకంటే తక్కువ వర్షపాతం నమోదు కావొచ్చని ఐఎండీ అంచనాలు చెబుతున్నాయి. అయితే దక్షిణ, వాయవ్య భారతాల్లోని కొన్ని ప్రాంతాలకు సానుకూల సంకేతాలు ఉన్నాయి. తమిళనాడు- పుదుచ్చేరి- కారైకల్, కోస్తా ఆంధ్ర-యానాం, రాయలసీమ, కేరళ-మాహే, దక్షిణ అంతర్గత కర్ణాటకల్లో ఎల్‌పీఏలో 88-112శాతం వర్షపాతం నమోదయ్యే అవకాశముంది. ఈశాన్య రుతుపవనాలు దక్షిణ భారతంలోని జలవనరులు నిండటానికి, నేలలో తేమ పెరగడానికి అత్యంత కీలకం. ఎల్‌నినో సమయంలో కొన్నిసార్లు ఆగ్నేయ ద్వీపకల్పంలో మంచి వర్షాలు పడుతుంటాయి. మరోవైపు బంగాళాఖాతంలో ఏర్పడే అల్పపీడనాలు, తుపానులతో వచ్చే వర్షాలు, వరదలను ఎదుర్కోవాలి. వచ్చే మార్చి-మే నాటికి దేశంలోని చాలా ప్రాంతాల్లో ఉష్ణోగ్రతలు సాధారణంకంటే ఎక్కువగానే ఉండవచ్చు. ఈ పరిస్థితుల్లో రాష్ట్ర ప్రభుత్వాలు అప్రమత్తం కావాలి. రాబోయే నెలల్లో వర్షపాతం, పంటలు, నీటి వినియోగాన్ని అనుసంధానిస్తూ సమగ్ర పర్యవేక్షణ చేపట్టాలి. వర్షపాతాన్ని, ఎండ తీవ్రతను నమోదు చేయాలి. జలాశయాల నిల్వలు, చెరువులు, భూగర్భ జలమట్టాలను గమనిస్తూ రబీ సాగుదారులకు సలహాలు అందించాలి. వర్షాధార సేద్యం, తక్కువ నీటిపారుదల ఉన్న ప్రాంతాలపై ప్రత్యేక దృష్టి పెట్టాలి. బంగాళాఖాతంలో అల్పపీడనాల వల్ల భారీ వర్షాలు కురిసే అవకాశముంది. కాబట్టి, ముందుజాగ్రత్తగా కరవు నిర్వహణతో పాటు వరద విపత్తును నిభాయించడానికీ తగిన సన్నద్ధత అవసరం.

► Read latest Editorial Newsand Telugu News► Follow us on Facebook, Twitter, Instagram& Google News. Tags :Published : 16 Oct 2026 01:33 IST

గమనిక:ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.