ఎదురుగాలే ఎదుగుదలకు ఊతం!
- A
- A+
- A++
పరిస్థితులన్నీ అనుకూలిస్తూ అంతా మనం అనుకున్నట్టే జరుగుతుంటే జీవితం సాఫీగా సాగిపోతుంది. కానీ మనలో దాగి ఉన్న అసలు సామర్థ్యం బయటపడేది మాత్రం ప్రతికూల పరిస్థితులు ఎదురైనప్పుడే. నిజానికి జీవితంలో ఎదురయ్యే ప్రతికూలతలన్నీ అడ్డంకులు కావు. చాలాసార్లు అవే మన ప్రగతికి సోపానాలు. గాలిపటం గాలితో కలిసి ఎగరదు. గాలికి ఎదురుగా పైకి ఎగురుతుంది. వెనుకనుంచి గాలి వీస్తే గాలితో పాటు కొట్టుకుపోతుంది. ఎదురుగాలే దాన్ని పైకి లేపుతుంది.
బలమైన ఈదురుగాలులూ, భారీ అలలతో కూడిన సముద్రంలోకి వెళ్లినప్పుడే నౌక కెప్టెన్‌ నైపుణ్యం ఏంటో తెలుస్తుంది. వాతావరణం అనుకూలంగా ఉండి అలలులేని సముద్రంలో ఎవరైనా ఓడను నడపగలరు. తుపానులో కూడా దిశను కోల్పోకుండా ఓడను గమ్యం వైపు నడపగలిగినవాడే నిజమైన నావికుడు. ప్రతికూల పరిస్థితులే మనలోని నైపుణ్యాలను మెరుగుపరుస్తాయి. మనం చేసే ప్రతి పనినీ అందరూ ఆమోదించాలని ఆశించడం సహజం. కానీ అది సాధ్యం కాదు. మన ఆలోచనలనూ, నిర్ణయాలనూ, పనితీరునూ ఎవరైనా విమర్శించవచ్చు. అంతమాత్రాన వాళ్లు శత్రువులు కారు. కొన్నిసార్లు మనకు కనిపించని లోపాన్ని మరొకరు చూపిస్తారు. విమర్శ ఎదురైనప్పుడు, ‘నన్నెందుకు విమర్శించారు’ అని బాధపడటంకన్నా ‘ఇందులో నేర్చుకోవాల్సింది ఏదైనా ఉందా?’ అని ఆలోచించాలి. విమర్శను అహంకారంతో తిరస్కరిస్తే ఒక పాఠాన్ని కోల్పోవచ్చు. విమర్శలోని ఉపయోగకరమైన అంశాన్ని ‘ఫీడ్‌ బ్యాక్‌’లా స్వీకరిస్తే అది మనల్ని మరింత మెరుగుపరుచుకునే అవకాశమవుతుంది. మన తప్పును చూపించే వ్యక్తి మనకు నచ్చకపోవచ్చు. కానీ అతడు చూపించిన తప్పు మనకు ఉపయోగపడవచ్చు. ఇదే ‘గ్రోత్‌ మైండ్‌సెట్‌’లోని సారం! అలాగే ప్రతి తిరస్కరణా మన విలువను తగ్గించదు. కొన్నిసార్లు అది సామర్థ్యానికి మరింత పదును పెడుతుంది. ఉహించని ప్రతికూల పరిస్థితులు ఎదురైనప్పుడు, ‘నాకే ఇలా ఎందుకు జరుగుతోంది?’ అనుకోకుండా, ‘ఈ పరిస్థితి నాకు ఏం నేర్పడానికి వచ్చింది!’ అని ప్రశ్నించుకోవాలి. ఆ ప్రశ్న మన దృష్టికోణాన్ని మార్చగలదు. ప్రతికూలతను శాపంగా చూసే మనస్తత్వం నుంచి పాఠంగా చూసే దిశగా తీసుకెళ్లగలదు.
గాలిపటం ఎప్పుడూ గాలితో ‘యుద్ధం’ చేయదు. గాలిని ఉపయోగించుకుంటుంది. మనమూ ప్రతికూల పరిస్థితులతో పోరాడనక్కర్లేదు. వాటిని అర్థం చేసుకుని మన ఎదుగుదలకు అనుకూలంగా మలచుకోవాలి. గాలిపటం ఎంత ఎత్తుకు ఎగిరినా దారంతో కలిసి ఉన్నంతవరకే అది సురక్షితం. ఎగరడానికి గాలి ఒక్కటే సరిపోదు. పటం దృఢంగా ఉండాలి. దారం బలంగా ఉండాలి. పట్టుకున్న చేయి స్థిరంగా ఉండాలి. సరైన దిశ కూడా ముఖ్యం. జీవితంలో ప్రతికూలతలు ఉంటేనే మన ఎదుగుదల జరిగిపోతుందని కాదు. వాటిని ఎంత సమర్థంగా ఎదుర్కొన్నామన్నది ముఖ్యం. క్రమశిక్షణ, విలువలు, ఆత్మవిశ్వాసం అనే ‘దారం‘తో జీవితాన్ని అనుసంధానించుకున్నప్పుడే ఎంత ఎత్తుకు ఎదిగినా మనమూ స్థిరంగా ఉండగలం. అసలు ‘ఎదురు గాలి’ అనేదే ఉండకూడదని కోరుకోవడం కంటే, ఎంతటి ఎదురు గాలిలోనైనా ఎగరగలిగే బలమైన ‘రెక్కల’ను కోరుకుందాం!
ప్రపంచ మొత్తం భౌగోళిక విస్తీర్ణంలో అడవులు 32శాతం మేర (414 కోట్ల హెక్టార్లలో) విస్తరించి ఉన్నాయి. అందులో 54శాతానికి రష్యా, బ్రెజిల్, కెనడా, అమెరికా, చైనాలే నెలవులు. వ్యవసాయం, ఇతర అవసరాల కోసం విచ్చలవిడిగా అడవులను నరికేయడంతో 1990 నుంచి దాదాపు 49 కోట్ల హెక్టార్ల పరిమాణంలో అరణ్యాలు నాశనమయ్యాయి. ఆయా కాలాల్లో అటవీ విస్తీర్ణం ఏటా కొత్తగా కాస్త పెరిగినా, అడవుల నరికివేతా విచ్చలవిడిగా సాగింది. ఆ వివరాలు.. (కోట్ల హెక్టార్లలో)
బలహీనులే తమ స్థితిగతులకు బాధ్యత వహించరు. పరిస్థితుల మీదో, ఇతరుల మీదో నింద వేస్తారు. బలమైన వ్యక్తిత్వం ఉన్నవారు తాము నమ్మిన విలువలకు కట్టుబడి ఉంటారు. ఆ క్రమంలో ఎలాంటి కష్టనష్టాలనైనా ఎదుర్కొంటారు.
► Read latest Editorial Newsand Telugu News► Follow us on Facebook, Twitter, Instagram& Google News. Tags :గమనిక:ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.
