పాదాల దుర్వాసన.. పోవాలంటే!
కాలమేదైనా కొంతమందికి పాదాల్లో చెమట రావడం సహజం! ముఖ్యంగా షూ, సాక్సులు ధరించినప్పుడు పాదాలకు గాలి తగలదు. ఫలితంగా దుర్వాసన రావడమే కాకుండా.. పాదాలు, గోళ్లకు ఇన్ఫెక్షన్లు వచ్చే అవకాశాలు కూడా లేకపోలేదు....
- ABC MEDIUM
- ABC LARGE
- ABC EXTRA LARGE
కాలమేదైనా కొంతమందికి పాదాల్లో చెమట రావడం సహజం! ముఖ్యంగా షూ, సాక్సులు ధరించినప్పుడు పాదాలకు గాలి తగలదు. ఫలితంగా దుర్వాసన రావడమే కాకుండా.. పాదాలు, గోళ్లకు ఇన్ఫెక్షన్లు వచ్చే అవకాశాలు కూడా లేకపోలేదు. అయితే ఇంట్లో లభించే కొన్ని పదార్థాలతో ఈ సమస్యను పరిష్కరించుకోవచ్చంటున్నారు నిపుణులు.
బేకింగ్ సోడాతో..
పాదాలను శుభ్రం చేసుకోవడానికి బేకింగ్ సోడాని ఉపయోగించడం వల్ల చక్కని ఫలితం ఉంటుంది. దీనికోసం పావు బకెట్ గోరువెచ్చని నీటిలో చెంచా బేకింగ్ సోడా కలపాలి. ఈ మిశ్రమంలో పాదాలు మునిగేలా కొద్దిసేపు ఉంచాలి. బేకింగ్ సోడా ఉపయోగించడం వల్ల చెమటలోని పీహెచ్ స్థాయులు అదుపులో ఉంటాయి. ఫలితంగా దుర్వాసన రావడం తగ్గుతుంది. ఈ విధంగా వారం రోజుల పాటు రాత్రివేళల్లో క్రమం తప్పకుండా చేస్తే మంచి ఫలితం కనిపిస్తుంది.
అల్లంతో..
చిన్న అల్లం ముక్క తీసుకుని దాన్ని బరకగా దంచుకోవాలి. ఒక కప్పు వేడి నీళ్లు తీసుకొని అందులో ఈ అల్లం పేస్ట్ని వేసి 10 నుంచి 15 నిమిషాలు ఉంచాలి. తర్వాత ఆ మిశ్రమాన్ని వడకట్టి చల్లారనివ్వాలి. రోజూ పడుకునే ముందు ఈ మిశ్రమంతో పాదాలకు మృదువుగా మర్దన చేసుకోవాలి. కొద్ది రోజుల పాటు ఇలా చేస్తే ఫలితం కనిపిస్తుంది.
నిమ్మరసంతో..
ఒక బేసిన్లో పావుకప్పు బేకింగ్ సోడా వేసి దానికి ఎనిమిది కప్పుల గోరువెచ్చని నీటిని జత చేయాలి. ఈ మిశ్రమంలో కొద్దిగా నిమ్మరసం వేసుకొని బాగా కలుపుకోవాలి. ఇందులో పాదాలను 15 నుంచి 20 నిమిషాలు ఉంచాలి. ఆ తర్వాత పొడి టవల్తో తుడుచుకుని పాదాలను ఆరబెట్టుకోవాలి.
