Aadhaar like number for EV batteries: ఈవీ బ్యాటరీలకు ఆధార్‌ తరహా నంబర్.. దేనికంటే?

Eenadu icon
By Business News Team Published : 04 Jan 2026 00:10 IST Ee Font size
  • ABC MEDIUM
  • ABC LARGE
  • ABC EXTRA LARGE
2 min read

Aadhaar like number for EV batteries | దిల్లీ: ఎలక్ట్రిక్ వాహనాల (ఈవీ) బ్యాటరీలకు ఆధార్ నంబర్ తరహా విశిష్ట గుర్తింపు సంఖ్య ఇవ్వాలని కేంద్ర రవాణా మంత్రిత్వ శాఖ ప్రతిపాదించింది. ఈ విధానం ద్వారా బ్యాటరీల ఎండ్-టు-ఎండ్ జాడను గుర్తించడంతో పాటు సమర్థమైన రీసైక్లింగ్‌ను ప్రోత్సహించడం దీని ముఖ్య ఉద్దేశం. ఈ మేరకు ముసాయిదా మార్గదర్శకాలను జారీ చేసింది. దీని ప్రకారం.. బ్యాటరీ తయారీదారు లేదా దిగుమతిదారు మార్కెట్‌లోకి తెచ్చే ప్రతి బ్యాటరీ ప్యాక్‌కు 21 అక్షరాల ‘బ్యాటరీ ప్యాక్ ఆధార్ నంబర్’ (BPAN) తప్పనిసరిగా కేటాయించాలి. ఈ నంబర్‌ బ్యాటరీపై స్పష్టంగా కనిపించేలా, తొలగించడానికి వీల్లేకుండా ఉండాలి.

బ్యాటరీలో వినియోగించే ముడిపదార్థాల దగ్గర నుంచి, వినియోగం, రీసైక్లింగ్‌ వరకు వివిధ దశలకు సంబంధించిన సమాచారాన్ని ఈ నంబర్‌ ద్వారా నిల్వ చేస్తారు. రీసైక్లింగ్ లేదా రీపర్పోజింగ్ వల్ల బ్యాటరీ లక్షణాలు మారితే కొత్త BPAN కేటాయించాలి. ఇది బ్యాటరీ ఎకోసిస్టమ్‌లో పారదర్శకత, జవాబుదారీతనం, స్థిరత్వం తెస్తుందని మంత్రిత్వ శాఖ ఆశిస్తోంది. బ్యాటరీ పనితీరు, పర్యావరణంపై ప్రభావాన్ని కూడా కచ్చితంగా ట్రాక్‌ చేయడం కుదురుతుందని తెలిపింది. ముఖ్యంగా సెకండ్-లైఫ్ వినియోగం, నిబంధనల అమలు, రీసైక్లింగ్‌లో సమర్థతలో ఈ BPAN కీలక పాత్ర పోషిస్తుందని కేంద్ర ప్రభుత్వం భావిస్తోంది.

  • సాంకేతిక లోపంతో ఖాతాలో రూ.40 కోట్లు.. నిమిషాల్లో రూ.1.75 కోట్ల లాభం

భారత్‌లో లిథియం-ఐయాన్ బ్యాటరీల మొత్తం డిమాండ్‌లో 80-90 శాతం విద్యుత్‌ వాహనాల నుంచే వస్తోంది. అందుకే మొదటి దశలో ఈవీ బ్యాటరీలకు ప్రాధాన్యం ఇస్తూ ఈ విధానాన్ని అమలు చేయనున్నారు. 2 kWh పైబడిన ఇండస్ట్రియల్ బ్యాటరీలకు కూడా ఇది వర్తిస్తుంది. ఆటోమోటివ్ ఇండస్ట్రీ స్టాండర్డ్స్ కమిటీ (AISC)కి నిర్దేశించిన ఆటోమోటివ్ ఇండస్ట్రీ స్టాండర్డ్స్ (AIS) ద్వారా దీన్ని అమలు చేయనున్నారు. బ్యాటరీ తయారీదారులు, ఈవీ తయారీదారులు, రీసైక్లర్లు, టెస్టింగ్ ఏజెన్సీలు, రెగ్యులేటరీ బాడీల ప్రతినిధులు ఈ కమిటీలో ఉంటారు. ఈ గుర్తింపు సంఖ్య వల్ల నకిలీ బ్యాటరీలను అరికట్టడమూ సాధ్యమవుతుందని ప్రభుత్వం భావిస్తోంది.

► Read latest Business Newsand Telugu News► Follow us on Facebook, Twitter, Instagram& Google News. Tags :