Fake Websites: నకిలీ వెబ్సైట్ల వలలో పడొద్దు
- ABC MEDIUM
- ABC LARGE
- ABC EXTRA LARGE
ఆన్లైన్ మోసాలు రోజురోజుకీ అధునాతనంగా మారుతున్నాయి. ఇలాంటి స్థితిలో నకిలీ వెబ్సైట్లను గుర్తించటం కీలకంగా మారింది. నేరగాళ్లు అధీకృతమైనవిగానే కనిపించే వెబ్సైట్లను సృష్టించి, వినియోగదారులను బోల్తా కొట్టిస్తుంటారు. వీటితో వ్యక్తిగత సమాచారం, బ్యాంకు వివరాలు, పాస్వర్డ్ల వంటి వాటిని దొంగిలిస్తుంటారు. అందువల్ల అప్రమత్తంగా ఉండటం, నకిలీ వెబ్సైట్లను గుర్తించటం అవసరం. వీటిని పట్టుకోవటానికి కొన్ని హెచ్చరిక సంకేతాలు తోడ్పడతాయి.
డొమైన్ పేరులో తేడాలు:నేరగాళ్లు చాలావరకూ ప్రముఖ కంపెనీలకు చెందిన వెబ్సైట్ల నకిలీలు సృష్టిస్తుంటారు. అక్షర క్రమంలో మార్పులతో బురిడీ కొట్టించాలని ప్రయత్నిస్తుంటారు. ఉదాహరణకు- ఫ్లిప్కార్ట్.కామ్ బదులు ఫ్లిప్కార్ట్ఆఫర్స్.ఇన్ అని మార్చొచ్చు. అమెజాన్.ఇన్లో ఓ అక్షరాన్ని సున్నాగా పేర్కొనొచ్చు. ఇలా డొమైన్ పేర్లలో వెంటనే పోల్చుకోలేని విధంగా చిన్న చిన్న మార్పులు చేస్తుంటారు. నిశితంగా చూస్తే తప్ప ఇది తెలియదు. కాబట్టి ఆన్లైన్ షాపింగ్ చేసేటప్పుడు ఒకటికి రెండు సార్లు వెబ్సైట్ల పేర్లను తనిఖీ చేసుకోవాలి.
కంటెంట్లో అక్షర దోషాలు:ప్రముఖ కంపెనీలు తమ వెబ్సైట్లలో కంటెంట్, డిజైనింగ్ మీద ప్రత్యేక శ్రద్ధ తీసుకుంటాయి. అక్షరదోషాలేవీ లేకుండా జాగ్రత్త పడతాయి. అందువల్ల కంటెంట్లో ఎక్కువగా అక్షరదోషాలు, సరిగాలేని వాక్యాలు, నాసికరం గ్రాఫిక్స్ కనిపిస్తే నకిలీ వెబ్సైట్ కావొచ్చని అనుమానించాలి. తొందర తొందరగా వెబ్సైట్ను క్రియేట్ చేసినప్పుడు, కంటెంట్ను సరిగా చెక్ చేయనప్పుడు ఇలాంటి తప్పులు దొర్లుతుంటాయి.
కాంటాక్ట్ సమాచారం ఇవ్వకపోవటం:విశ్వసనీయమైన వెబ్సైట్లలో అబౌట్ అజ్ పేజీ లేదా కాంటాక్ట్ సమాచారం ఉంటుంది. నకిలీ వెబ్సైట్లలో ఇది ఉండదు. నేరగాళ్లు కావాలనే ఇలా సృష్టిస్తుంటారు. వెబ్సైట్లో కంపెనీకి సంబంధించిన సమాచారం కనిపించకపోతే మోసం చేయటానికి ఉద్దేశించింది కావొచ్చని అనుమానించాలి. అలాగే ఆఫీసు చిరునామా, కస్టమర్ కేర్ నంబర్, జీమెయిల్ వంటి ఉచిత ఈమెయిల్ ఐడీ వంటివి పేర్కొనకపోయినా సందేహించాల్సిందే.
సెక్యూర్ కనెక్షన్ లేకపోవటం:అటాకర్ల దాడుల నుంచి కాపాడటానికి వెబ్సైట్లు టీఎల్ఎస్/ఎస్ఎస్ఎల్ సర్టిఫికెట్లను ఉపయోగిస్తాయి. మీ పరికరం, సైట్ మధ్య డేటా మార్పిడిని ఇవి ఎన్క్రిప్ట్ చేస్తాయి. ఈ సర్టిఫికెట్లలో డొమైన్, ఆర్గనైజేషన్, ఎక్స్టెండెట్ వ్యాలిడేషన్ అని మూడు రకాలుంటాయి. నేరగాళ్లు చాలావరకూ డొమైన్ వ్యాలిడేషన్ సర్టిఫికెట్లను వాడుకుంటారు. ఈ సర్టిఫికెట్ డొమైన్ యాజమాన్యాన్ని ధ్రువీకరిస్తుంది గానీ సంస్థ వివరాలను ధ్రువీకరించదు. వాణిజ్య అవసరాలకు ఇది తగదు. కాబట్టి యూఆర్ఎల్కు ముందు https://ఉందేమో చూసుకోవాలి. ఇది కనెక్షన్ సురక్షితమని తెలియజేస్తుంది. కేవలం httpమాత్రమే ఉన్నట్టయితే సురక్షితం కాదని తెలుసుకోవాలి.
నమ్మశక్యం కాని ఆఫర్లు:ప్రముఖ కంపెనీల వస్తువులు అతి తక్కువ ధరకే ఇస్తామని చెప్పటమూ హెచ్చరిక సంకేతమే. యూజర్లు త్వరగా పేమెంట్ పూర్తిచేయటం కోసం నేరగాళ్లు ఇలాంటి పన్నాగం పన్నుతుంటారు. కాబట్టి నమ్మశక్యం కాని ధరలకు వస్తువులు దొరుకుతున్నాయంటే ఒకటికి రెండు సార్లు ఆలోచించాల్సిందే.
పురికొల్పే సందేశాలు:‘కేవలం ఒక వస్తువే ఉంది. త్వరపడండి’ అంటూ ఊరించటం ద్వారానూ మోసగాళ్లు బురిడీ కొట్టించొచ్చు. లేదా కౌంట్డౌన్ టైమర్లతో కొనేలా పురికొల్పొచ్చు. పేజీని రిఫ్రెష్ చేసిన ప్రతిసారీ ఇది రీసెట్ అవుతుంటుంది. ఆఫర్ నిజమైందో కాదో ధ్రువీకరించుకోకుండా వెంటనే నిర్ణయం తీసుకునేలా చేయటం వీటి ఉద్దేశం. ఇలాంటి అనుచిత సందేశాలు వెబ్సైట్లో కనిపిస్తే నకిలీది కావొచ్చని అనుమానించాలి.
► Read latest Technology Newsand Telugu News► Follow us on Facebook, Twitter, Instagram& Google News. Tags :Published : 24 Dec 2025 00:50 IST
